Pɔgedire Farefari Buuri Puan

Pͻgedire Pↄgedire de la malum sεka ti pugela la budaa ni pire paε beene, ni ta di taaba gee malum malema sεba n nari. Yeledaasi si si’a n ni nara ti budaa la ka yire duma doose maalε a gee ti pugela la nyaa baŋε ele budaa la. Yeledaasi wa yia daana de la Pↄgelεgerε.

Budaa san ni nyε pↄka bↄta, ita yεla zo’e zo’e bͻ’ͻra e magese wuu; da’ara lↄgerↄ bͻ’ͻra e, bεlegera e ti pↄka la suure kε e, n de pͻdelεgerε. Pↄgelεgerε wa puan budaa la ka kini pↄka la sↄ yire. Budaa la, la pↄka la ma’a n sekeri taaba sↄsera bↄkera taaba, baŋera taaba suure n boti sεla, gee bͻ’ͻra taaba ka’aŋↄ gura daase’ere daarε ti budaa la wan ta kiŋε pↄka la yire.

Siyi puan de la Limesego. Budaa la san ta sↄsε la pↄka la paε beene, pↄka la ni ta yele la a dↄgereba. Pↄka la dↄgereba san bo budaa la yↄ’ↄ, budaa la nyaa wan doose a tadaana bii a zↄ kiŋε pↄka la yire. Kinε kana wa ni dεna la budaa la yia kinε. Ba san ni yε’εsa pugela la sↄ yire, ba ni zãla la gu’urε la taba kiŋε. Budaa la la a zↄ la san ni ta paε pugela la sↄ yire, ba ni ta zi’ire la santeko nͻͻren. Yire la duma san bo budaa la la a zↄ la ko’om, budasεka n boti pugela la ni ka nyu ko’om la, ti la pa’alε ti eŋa n boti ba poyua la. Sitã puan de la Yire limesego. Pugela la san paε a sira la yire, a sↄ yire duma la wan yi e ti a lebe yire na kaa ba bisε.

Pugela la sira yire duma ni niim la zom gee maalε ku’uŋↄ, tara taberε, ti nεra nyaa doose pugela la kiŋε ka sↄ yire. Pugela la ka ye’eseri a sↄ yire la a ma’a. Pↄgedire bii Siri ele n pa’asε sinaasi. Pugela la sↄ yire duma n ni bo dabeserε maasum ti pugela la tãpa nyaa ni tari pugela la kiŋε ka sira la yire. Daase’ere daarε ti ba yeti ba tari pugela la kiŋε ka sira yire la, ba ni tiigε ka sira la yire duma la mε. Ŋwana wan basε ti pugela la sira yire duma la me ta’am maasum suŋa suŋa ti ba to’e ba pↄga bii ba poyua la.

Siri ele san ni ba’asε Pↄgezↄrε n ni taε. Pↄgezↄrε de la malum sεka ti ba ni malum budaa la yire. Pugela la tãpa n ni kiŋε budaa la yire. Ba tari la dusi siyi la nuusi si naasi zↄta pↄka. Ba ni kiŋε la yu’uŋↄ ti ba (sira yire duma la) ni soke ba (pugela la tãpa) bisε ba n boti dunsi’a ti ba ku bo ba, magese wuu; baa, bua bii pesego. Pↄgezↄrε wa de la diisum bunↄ ti ba ita. Pugela la tãpa la san to’e ba lↄgerↄ la, ba ta’am di (obe) nεnↄ la sore, amaa see ti ba gee duŋa la zuo basε ganε la puan tari ta bo yire la daana bii kiima la yire.

Nu’o ŋmε’a n tagelε pͻgezͻrε poore. Nu’o ŋmε’a de la yelezuo tumam n-yeti yaa buuri malema puan. Nu’o ŋmε’a wa de la malum sεka ti budaa la yire duma ni tari nↄdↄↄ la ku’uŋↄ, gu’urε la taba kiŋε pↄka la yire. Ba ni ku ku’uŋↄ la mε maalε gee tari nↄdↄↄ la vua. Nↄdↄↄ la ni ta bo la Sandaana yire, gee ti ku’uŋↄ la bͻ’ͻra la dεεma la deon. Budaa la ni basε mε ti mina ãasema yire n boi a pↄga la duma tiŋa kiŋε ta ŋmε nu’o la. Ba yi’iri budaa kana la “pↄgesigera”. Nↄdↄↄ la ni ta bo Sandaana la ni dεna la sεεra pa’alε ti ba to’e ba poyua la nu’o nua, le yε’εsa la kelum pa’alε ti ba poyua la ka le tara sore ti a yese yiŋa bↄ budaasi.

Azunyuuse malema de la malum seto ti tu malena bͻ’ͻra poyↄkiin duma ma’a. Pugela la san dεna a dↄgereba la poyↄkiima gee san ele, a sira yire duma la wan soke ba dεεnduma la bisε ba n nyuuseri sεla magese wuu; ba nyuuseri la daam bii zom. Ba san nyuusera la daam, pugela la sira yire duma la wan iŋε daam, zom-dugerema, ku’uŋↄ, nↄnya’aŋa, kuure la dεεma ku’uŋↄ ta nyuuse ba dεεnduma la. Ba san le nyuusera la zom, sira yire duma la wan iŋε zom la ma’a (sεla ka pa’aseri zom la puan) ta nyuusera ba. Bilam puan ti pugela la dↄgereba nyaa wa nyaŋε dikε dia iŋε nͻͻren ba dεεma la yire.

Tu kan tamε Nyuusepeelego. Nyuusepeelego wa dagi sεla n kↄ’ↄm dεna kalam kalam tuunε. Di ta’am dikε yuuma gee ti ba nyaa baŋε nyuuse nyuusepeelego wa. Fu san tara daam yↄa anaasi, see ti fu tara ki’ini sinaasi la nuusi sinaasi. Fu me san kelum tara la daam yↄa atã, see ti fu tara ki’ini sitã la nuusi sitã, tara zom kãsa pi’ↄ, zom-dugerema talaŋa, taberε, pedaa, tabuka la tadukↄ yε’εsera Sandaana la yire. Sandaana la wan ta loe a nua, la a daam yoore gee nyaa tari ba kiŋε dεεma la yire. Ba san ta paε dεεma la yire, ba luti pesego la la zãnyↄren gee ki’ira deon. Ba san ta pu’usε ba’asε, ba nyaa wa kaε dapoore ta ku pesego la, lobe di basε da’aŋan, kε ta si’ε pesego la da’aŋan.

Ba nyaa san yeti ba nyuuse, ba ni iŋε la daam iŋε yoore puan kãabε pugela la sↄ gee nyaa nyuuse pugela la. Ba ni dikε la sεba n mi nyuusego la ti ba sige da’aŋan ta nyuuse mina e mi nyuusego la yia. Ba ni puregε daam la mε biŋe bↄberε bↄberε, gee nyaa tugese e ti a nyu. Siibega daana e nyuuseri e. Ba san ba’asε bala ba nyaa wan yi dεεma la ti a tole ti ba nyuuse e butã gee nyaa purege, iŋε basε tiŋa gee nyaa tugele e ti a nyu. Nεresεba woo n boi yire la puan san ka kisa, ba nyuuseri ba za’a la bala. Nyaa san ba’asε ba nyaa wan iŋε zom-dugerema la basε tiŋa gee nyaa dikε daam la nyu gee sεla n gee la doe zinzaka la puan ti nεra woo nyu gee ti ba nyaa sε nεnↄ la tↄrε ti ba obe.

Ba san nyuuse ba’asε ti ba nyaa dikε tabuka la tadukↄ la bo dεεma la. Beere san yilegε ti ba nyaa kiŋε Sandaana la yire ti a ta dikε a daam yoore la ti a zaam loe ze’ele la ti ba nyu, ti a nyaa mↄm ba gee ti ba nyaa lebe dεεma yire la ti ba dikε daam la bo kiima ti a nyu gee ti ba nyaa basε ba ti ba kule. Za’a daana de la Pↄgesulε. Pↄgesulε de la nii ti budaa la yire duma ni tari kiŋε ta bo pugela la yire duma. Fu san tara paŋa ti ba san bↄta nasa’ara atã fu bo’ori ba mε. Fu san le tara nasa’ara ayi la piisi siyopↄi fu kelum bↄ’ↄra ba mε. Fu san kelum ka tara paŋa gee nyε nasa’arε la piisi siyopↄi fu le bↄ’ↄra ba mε gee ti nasa’arε gεta.

Dεεnduma la san yeti ba boti la ba poyua la nii ti fu san nyε nii la, fu ni yi ba mε ti ba wa’am na bisε nii la. Ba san bisε nam nii la ba nyaa wan kule gee ti pↄgesegera la doose la nεra pe’e nii la kiŋε ta bo dεεnduma la. Nii la ka gaseni, san dagi mina ti ba yeti a di’e la nagipεεlega bii nagisabelega yεsera ma’a.

Pɔgedire n bɔgesɛ se'em

1. Budaa ta'am nyɛ pugela n ka ele bɔta bɔta ta di ka doose sɛla ti ba wi'ira ti a sɔɛ wanɛ elese.

2. Pɔka ta'am ele gee tari ka yibega (pɔsɔɔ) ti ka nyɔgera ka kɔma gee suŋera e. Pugela (pɔsɔɔ) la san ta zo'e kutɛ, pɔka la sira, bii yire la puan nɛra ta'am kɔ'ɔm di pɔsɔɔ la ti ku dɛna a pɔga.

3. Nɛra ta'am kiŋɛ satiŋa ta seke pɔka dɔgum. Pɔka la san dɔgɛ ba'asɛ, saana la n seke ka dɔgum la n ne lu (sigɛ bia la yu'urɛ). Ka san dɛna pugela dee beere ta zo'e kutɛ ba ta'am dikɛ pugela la bo mina n daa seke ka dɔgum la bii a dayua bii a yire budibesɛka.

4. Fu zɔ bii suma ta'am dikɛ pugela bii a tã bo fu ti fu di pɔga.

5. Nɛra me ta'am tibɛ pugela ti ka san ta ana sum bii tara imma'asum, ka sɔduma ta'am dikɛ ka bo tiba la ti a di ka dɛna a pɔga.

6. Naba san nyɛ pɔka/ pugela nɔŋɛ, a ta'am basɛ ti ka zi'ire a na'am gɔŋɔ la zuo. Pɔka/pugela la san diŋɛ zi'ire na'am gɔŋɔ la zuo, la de la Naba di pugela/ pɔka la.

7. Budaa ta'am ki de gee basɛ ka pɔga ti ka yibega, kiima, bii nɛra yoo di pɔka la. Kalam ti ba ne yeti a duma di la Pɔkɔɔrɛ la. Fu san di Pɔkɔɔrɛ la, fu dɔgeri kɔ'ɔma la bɔ'ɔra la ki'ima la ( ka Sıra la ki la)

8. Mɔgɔ ta'am nyɔkɛ nɛra ti a to'e Nii bii ligeri se'em zi'an basɛ a poyua zuo. A poyua la san ta zo'e kutɛ, la de la pɛgerɛ ti a dikɛ ka elese se'em ti a daa to'e a zi'an la. Ŋwana wa ti ba ne yeti a ŋmɛ la Tampugerɛ la.

Pɔgedire sum yɛla

. Pɔgedire basɛ ti buuri n bɔna wuusa

. La basɛ ti budaa la pɔka la suŋera taaba tuuma puan.

. La basɛ ti pɔka la budaa la ta'am bisera ba kɔma suŋa suŋa ba san dɔgɛ.

. La de la sɛla n gu yalesi tuuma, yele yele wuu pɔka la zi'an.

. Pɔga la sira la san beere kurega ba kɔma la wan tee bisera ba zuo yɛla.

. La kelum basɛ ti buuri yɛla bɔna mɛ wuusa.

. La basɛ ti yire yu'urɛ n ka bɔregera.

Sɛla iŋa ti farefari duma dita pɔgeba n ŋwana1. Yimɛrɛ bii kɔma dɔgebɔ iŋa. 2. Nɛra San di pɔga dɔgɛ kɔma ba wan suŋera e tuuma puan ti lɔgerɔ bɔna ti ba vom ana nyɛlum. 3. Farefari duma vom yɛla puan ba puti'irɛ de la, la ni Nara ti dɔgereba San ta kuregɛ ki, nɛra bɔna sɔɛ vaɛ ba lɔgerɔ la dee bisera yire show.