Azambeene

Azambeene dela kibisi bo Booŋo duma (Bɔɔsi) ti ba dita dɛ yuunɛ woo tɛ̃ra ba buuri bii ba yaabeduma n yuum iŋɛ se'em ta'am wa zi'ire Booŋo tiŋa la puan.

La n naam se'em ti Bɔɔsi dita Azambeene n ŋwana.

Bɔɔsi la tuusum ze'ele la Naleerego wa'am Booŋo la na. Yaaba Awubegɔ yuum dela tɔ̃'ɔsa/ gowia ɛɛra, a yuum ɛ ta paɛ la tiŋa wa puan ti nɛreba n bobini, ba yuum dela muusi la zangeto. A yuum naɛ la ba mɛ bɔna tiŋa la puan dee ɛɛra a nɛnɔ la. Ti tiŋa wa duma yuum ta isegɛ digera e dee yeti a boti la bama pɔgeba bala zuo a lebe a lebega zi'a. Ti a yuun nyaa lebe Naleerego la ta yele ba ba/ sɔ la yeti, eŋa ɛ ta nyɛ la tiŋa ti ka ana suŋa dee nɛreba me n boi bini bala la, a wan iŋɛ la ŋwani ta'am de'e tiŋa la.

Dee eŋa yuum ta paɛ tiŋa la puan la, a yuum paɛ ti nɛreba n bo kulega puan ãgera ko'om dee ba n yuum nyɛ e ti a yɛ tɔ̃'ɔsa lɔgerɔ la, ba za'a yuum zo mɛ de dee la bia kayila ma'a ti a soke bia la ti Naba yire bola bɛ? Ti bia la yuum tari e kiŋɛ Naba la yire.

Bilam puan ti Naba la yuum yeti a wi nɛreba lagesɛ ti ba doose e kiŋɛ tiŋa la puan, bilam puan ti Awubegɔ la yuun yeti aayi, eŋa ka boti nɛreba zo'e zo'e dee eŋa boti la bisɛka n tari eŋa wa'an Naba yire wa na la, bikaŋa suurekabɛ. Naba la yuum pa'aleba yeti, ba san ta paɛ tiŋa la puan, ba lu muurɔ yagelɛ tiisi zuo zo'e zo'e deti winɛ san ma'ɛ ti ba laŋɛ bugum la dee kaasɛ, dee ba san iŋɛ bala ti nɛreba la san nyɛ bala, ba wan zo de dee tiŋa la bɔba.

Ba yuum sirum iŋɛ la bala ti nɛreba la yuum zoi de dee tiŋa la basɛ ti ba sɔna tari paɛ zina wa. Magesɛ wuu 'Yeezu' n ki bo faarebiisi ti ba dɛ'ɛna yuunɛ woo tɛ̃ra a yele se'em la, Boosi me de'eni la bala nuu tɛ̃ra ba yaabeduma la n yuun zɛbɛ fãɛ tiŋa la yele.